ერთერთი ყველაზე ტიტულოვანი ფეხბურთელი, საკლუბო და სანაკრებო დონეზე ერთხელ მაინც მოგებული აქვს თითქმის ყველა ის ტურნირი სადაც უთამაშია; ბარსელონას რიგებში: ესპანეთის ჩემპიონატი, ესპანეთის თასი, ევროპის ჩემპიონთა თასი, მსოფლიოს საკლუბო ჩემპიონატი. ესპანეთის ნაკრების რიგებში კი მსოფლიოს და ევროპის ჩემპიონატები. ასევე უამრავი ინდივიდუალური საფეხბურთო ჯილდოს მფლობელია და თანამედროვე მსოფლიოს საუკეთესო გამთამაშებლად ითვლება.
ჩავიერ ერნანდესმა მთელი თავისი საფეხბურთო კარიერა "კამპ ნოუზე” გაატარა. იგი კატალონიურ კლუბში 11 წლის მივიდა და მას შემდეგ მისი პროგრესი ყოველთვის შესამჩნევი იყო. ამის წყალობით, 1997-98 წლების სეზონში ჩავი ახალგაზრდული გუნდიდან "ბარსელონა ბ”-ში გადავიდა.
"ბარსა ბ”-ში ჩავი ხორდი გონსალვოს გუნდის ტვინად იქცა და თანაგუნდელებთან ერთად მეორე დივიზიონამდე აღზევდა.
ჩავის ოცნება, ეთამაშა "ბარსას” პირველი გუნდის შემადგენლობაში, რეალობად გადაიქცა 1998 წლის 18 აგვისტოს, როდესაც მისი გუნდი ესპანეთის თასზე "მალიორკას" დაუპირისპირდა. ახალგაზრდა ნახევარმცველი მოედანზე თავიდანვე გამოვიდა და მწვრთნელს იმედები არ გაუცრუვა, გაიტანა რა გოლისადებიუტო შეხვედრაში. ჩავიმ მნიშვნელოვანი როლი ითამაშა 1998-1999 წლებში "ბარსელონას” მიერ ესპანეთის ჩემპიონატის მოგებაში.
1999-00 წლების სეზონში ჩავის ამჟამინდელმა მწვრთნელმა და მაშინდელმა თანაგუნდელმა, პეპ გვარდიოლამ, სერიოზული ტრავმა მიიღო და ერნანდესსაც თავის გამოჩენის მეტი შანსი მიეცა. ხოლო მას შემდეგ, რაც გვარდიოლამ იტალიას მიაშურა, ჩავი "ბარსას" ძირითადი შემადგენლობის უცვლელ წევრად იქცა.
ჩავი მნიშვნელოვანი ფიგურა იყო ლუი ვან გაალის, კარლოს რექსაჩის, ფრანკ რაიკაარდის დროს და გვარდიოლას მწვრთნელობის ქვეშაც, ძირითად შემადგენლობაში ადგილი გარანტირებული აქვს. თავისი სტაბილური ასპარეზობის წყალობით, ჩავიმ კლუბში 300 შეხვედრის ჩატარება უკვე 25 წლის ასაკში მოახერხა. 2004-05 წლების ტრიუმფალურ სეზონში ჩავი რაიკაარდის გუნდის ყველაზე მნიშვნელოვანი ფეხბურთელი იყო, ითამაშა რა ესპანეთის ლა ლიგაში 38 ტურში 36 შეხვედრა.
თუმცა კატალონიელი ნახევარმცველის ცხოვრებაში რთული პერიოდებიც იყო. მას არასდროს დაავიწყდება 2005 წლის 2 დეკემბერი, როდესაც ლა მასიაზე გამართული მორიგი ვარჯიშის დროს მარცხენა ფეხის მუხლის სერიოზული ტრავმა მიიღო და იძულებული იყო ფეხბურთს ხუთი თვით ჩამოშორებოდა. მოედანზე კვლავ გამოსვლა ჩავიმ 2006 წლის 29 აპრილს მოახერხა, ხოლო სულ მალე მისმა გუნდმა როგორც ესპანეთში, ასევეევროპაში პირველობა იზეიმა.
რაიკაარდის ერის ბოლო ორი სეზონის განმავლობაში ჩავი გუნდში ყველაზე ხშირად გამოყენებადი ფეხბურთელი იყო. 2007-08 წლების სეზონში კი პირადი რეკორდი დაამყარა, გაიტანა რა ესპანეთის ჩემპიონატში 7 გოლი, რითიც წინა სარეკორდო მაჩვენებელი თითქმის გააორმაგა.
გუნდში გვარდიოლას მწვრთნელად მოსვლის პირველივე სეზონში კი ჩავიმ ყველა ტურნირზე გატანილი გოლების რაოდენობით საკუთარი რეკორდი გააუმჯობესა, გაიტანა რა 10 გოლი 54 შეხვედრაში. ანდრეს ინიესტასთან ერთად, 2008-09 წლების სეზონში მან მოედნის ცენტრში შექმნა ტანდემი, რომელმაც გუნდისთვის სამი ტიტულის მოტანაში ძალზე მნიშვნელოვანი როლი ითამაშა.
ესპანეთის ეროვნულ ნაკრებთან ერთად ჩავიმ მსოფლიოს 2002 და 2006 წლების ჩემპიონატზე ითამაშა. წარუმატებელი ევრო 2004 შემდეგ 2008 წელს კი, ამავე ტურნირზე ტრიუმფალურად გამოვიდა. ჩავი ევროპის 2008 წლის ჩემპიონატის საუკეთესო ფეხბურთელი გახდა ესპანეთმა კი ევროპის ჩემპიონატი მოიგო. ზუსტად ორ წელიწადში კი ჩავი და ესპანეთის ნაკრები უკვე მსოფლიოს ჩემპიონები გახდნენ სამხრეთ აფრიკაში გამართულ 2010 წლის მსოფლიოს ჩემპიონატზე, ამჯერადაც ჩავი ტურნირის ერთერთ საუკეთესო მოთამაშედ მიიჩნიეს.
გუნდური მიღწევები
ბარსელონა
ესპანეთის ჩემპიონი – 1998/99, 2004/05, 2005/06, 2008/09, 2009/10
ესპანეთის თასი – 2008/09
ესპანეთის სუპერთასი – 2005/06, 2006/07, 2009/10, 2010-11
ჩემპიონთა ლიგა – 2005/06, 2008/09
ევროპის სუპერთასი – 2009/10
მსოფლიოს ჩემპიონატი – 2009/10
ესპანეთის ნაკრები
- მსოფლიოს ჩემპიონი - 2010
- ევროპის ჩემპიონი – 2008
- ოლიმპიური თამაშების ვერცხლის მედლის მფლობელი – 2000
- 20 წლამდელთა მსოფლიოს ჩემპიონი – 1999
ინდივიდუალური მიღწევები
- მსოფლიოს საუკეთესო ფეხბურთელი World Soccer-ის ვერსიით - 2010
- ევროპის ჩემპიონატის საუკეთესო ფეხბურთელი – 2008
- ჩემპიონთა ლიგის საუკეთესო ნახევარმცველი – 2008/09
- მსოფლიოს მე-3 საუკეთესო ფეხბურთელი FIFA-ს ვერსიით – 2009
- მსოფლიოს მე-3 საუკეთესო ფეხბურთელი France Football-ის ვერსიით – 2009
- მსოფლიოს მე-3 საუკეთესო ფეხბურთელი World Soccer-ის ვერსიით – 2009